بسم الله الرحمن الرحيم

{ الصحة النفسية مو مجرد رفاهية }

معاكم زهراء بدر العامري .

كلنا نمر بأيام صعبة، لحظات نحس فيها بثقل العالم على أكتافنا، يمكن ما نقدر نفسرها، يمكن حتى ما نقدر نبوح فيها لأحد، لكن الشي الأكيد إن “الصحة النفسية” مو شي نقدر نتجاهله أو نعتبره كماليات.

الصحة النفسية ببساطة، هي قدرتك على إنك تعيش يومك بسلام داخلي، تتعامل مع ضغوط الحياة بدون ما تنهار، تحس بقيمتك، وتقدر تحب نفسك حتى لو مريت بفشل أو خيبة.

الغريب إن وايد ناس تهتم بجسمها، تتابع أكلها، تلعب رياضة، تروح حق دكتور إذا حست بصداع، لكن لو انكسر خاطرها تسكت، لو حسّوا بضيق عميق يهملون هذا الشعور، ويختارون إما العزلة عشان يعيشون هالحالة بعيد عن عيون الناس، أو إنهم ينفجرون بدون شعور عند أول واحد يكون جدامهم.

تتوقعون ليش نهتم بكل شي إلا مشاعرنا و صحتنا النفسية؟

اللي لازم نفهمه إن الاهتمام بالصحة النفسية مو دلع، ولا مبالغة ولا تريند أو هبه دارجة بالوقت الحالي، بالعكس الاهتمام بصحتنا النفسية يعبر عن مدى وعينا وقوتنا الداخلية.

الصحة النفسية تشمل إنك تقول “لا” وقت ما تحتاج، وتبتعد عن العلاقات المؤذية، وتتعلم شلون تعبر عن مشاعرك بدون خوف أو خجل. تشمل إنك توقف وتقول “ أنا تعبان، وأحتاج أتكلم أو أرتاح “، وأهم شي تشمله الصحة النفسية هو إنك تكون عارف شنو الحدود العاطفية وشلون توضحها لغيرك عشان ما يأذي مشاعرك ونفسيتك.

اخذ وقتك، اسمع نفسك، لا تجلد ذاتك، وخل عندك ناس تثق فيهم يدعمونك، ناس تحس معاهم بالأمان، حتى لو كانوا اثنين أو حتى واحد بس. وإن ما حصلت أحد، ما في شي يمنعك تروح لأخصائي، تتكلم وتفرّغ مشاعرك السلبية والمؤذية لك، مثل ما تروح حق أي دكتور ثاني لو حسّيت بألم.

خلنا نتذكر دايمًا، ما نقدر نعيش حياة متوازنة بدون نفس مرتاحة، وإذا حسّيت إنك مو بخير، لا تحس إنه عيب، العيب الحقيقي إنك تسكت وتخلي روحك تتأذى وأنت ساكت. اهتم بنفسك، لأنها تستاهل.